POBLACION, Jamindan, Capiz – Ginarekomendar ang pagpahamtang sang signage sa Mambusao river bilang daku nga bulig agud indi na maliwat ang pagkalumos sang 8-anyos nga bata sa Barangay Poblacion, Jamindan, Capiz.
Ang biktima ginkilala bilang isa ka minor de edad nga lalaki, Grade-III student kag residente sang Barangay San Jose, Roxas City.
Matandaan nga natabo ang insidente Agosto 17, sa takna sang alas otso sa aga kun sa diin kaupod niya ang iya amay nga maligo kuntani sa suba apang nag una ini kag nakita na lamang sang iya amay ang kamot nga nagapangayo ini sang bulig.
Sa interview sang Bombo Radyo kay Police Major Jaypee D. Silvestre, Officer-in-Charge sang Jamindan Municipal Police Station, iya ginpahayag nga sang natabo na ang pagkalumos gilayon man ini gintabangan sang iya amay, apang sa masubo nga balita gindeklarar ini sang Jamindan Primary Care Facility nga dead on arrival sa takna sang 9:17 sang aga.
Suno kay Silvestre antes paman makita sang amay ang iya anak nadugayan ini nga magpangayo sang bulig kag sa pila ka minutos nakita nila ini kag gilayon nga ginrevive pinaagi sa Cardiopulmonary Resuscitation “CPR”, kag gilayon nag abot man ang katapo sang Jamindan Capiz Municipal Disaster Risk Reduction and Management Office “MDRRMO”, agud maghatag sang nagakaigo nga pagbulong apang wala ini nasolbar.
Pahayag pa niya nga matawhay ang suba sadtu nga adlaw, kag bilang kabahin sang programa sadtu pa man yara na sang ginapatigayon ang Roxas City Disaster Risk Reduction and Management Office “CDRRMO”, sang trainings sa pag rescue agud may insaktu nga ihibalo ang kadaman kaupod ang katapo sang kapulisan sang Jamindan.
Sa karon ang insidente mahimo gid nga malikawan suno sa hepe kun may yara sang hugot nga pagbantay sa mga kabataan kag indi mag salig nga matawhay ang katubigan bangud ang ginatawag nga insidente indi mahibaluan kun san-o matabo kag bilang kabahin sang hitabo ang pagkalumos ginatawaw nga mangin leksyon sa tanan.
