ROXAS CITY – Ginkompirmar ni Department of Education (DepEd) Aklan Division Superintendent Dr. Miguel Mac Aposin ang pagpaiway sang natalana nga Western Visayas Regional Athletic Association (WVRAA) Meet 2020 sa probinsya sang Aklan bangud sang 2019 Novel Coronavirus Acute Respiratory Disease (nCoV-ARD) outbreak.
Suno kay Aposin nga nakatutok ang lokal nga gobyerno sang Aklan sa ginakahangaw-an nga nCoV.
Ang pagpaiway sa nasambit nga regional sporting event ang isa ka pamaagi agud nga maamligan nga ikaayong lawas sang mga atleta kag mga sports officials.
Pagatalakayon naman sa meeting nga pagatambungan sang mga DepEd division superintendents sa adlaw sang Biyernes ang mangin bag-o nga schedule sang amo nga sporting event.
Ginpahayag ni Aposin nga mismo si Aklan Governor Florencio Miraflores ang nagdesisyon nga ipaiway ang WVRAA bangud nakatutok ang lokal nga gobyerno sa mga nCoV-Persons Under Investigation (PUIs) sa Aklan.
Nagadepende kag nagahulat karon ang lokal nga gobyerno sang Aklan sa mangin abiso sa ila sang mga local health authorities.
