ROXAS CITY – Pagpalangga sa merkado publiko sa syudad sang Roxas ang nagtulod sa market administrator nga i-shorten ukon palip-utan ang oras sa operasyon sang Teodoro Arcenas Trade Center (TATC), para malikawan ang pagdamu sang kaso sang COVID-19.
Ginpahayag ni Heloise Mendoza, market administrator nga kasunod sa pag-ayo sini sa COVID-19 kag pagbalik sa trabaho sa TATC nagpanumdum ini sang tikang kag intervention nga dapat himoon agud indi na magdamo pa ang COVID-19 cases sa syudad sang Roxas kag probinsiya sang Capiz.
Ba-se sa personal observation kag naaktuhan sang nagpatigayon sang inspeksyon sang aga kag gab-I, kadam-an sa mga vendors ang wala na nagasuksok sang face mask samtang nagabaligya.
Suno kay Mendoza nga makapila na ka beses sini ginmuno ang madakpan nga mga vendors nga magsuksok sang face mask kag face shield nga matood nagtuman, apang pagbalik sini ginahukas kag gina-us-us sa ila sag-ang ang face mask.
Gindugang pa sang opisyal nga indi masarangan sang mga personnel sang TATC nga bantayan ang mga vendors tobtob sa gab-I gani nagsulod ang bag-o nga scheme nga ginpatuman sa TATC nga pagshorten sang oras sa pagbukas kag pagsarado sang merkado publiko.
May maayo nga epekto ang bag-o nga scheme bangud may oras para ma-disinfect ang merkado, wala na sang tsansa nga maka-inum ukon mag-istambay sa TATC kag makapauli sang temprano sa ila balay ang mga vendors, makapahuway kag makaangkon sang oras sa ila pamilya.
Sang ginkuhaan ni Mendoza sang reaksyon ang pila ka mga vendors, ginpahayag nga 85 porsyento sa mga vendors/negosyante ang pabor sa bag-o nga pagsulundan.
Samtang nagadepende sa mga vendors ang pagbalik sa kinaandan nga oras ang operasyon sang merkado suno kay Mendoza, sa diin kun makita sini nga disiplinado ang mga vendors kag nagagamit sang face mask kag face shield, indi siya magpang duha duha nga ibalik ang orihinal nga oras sang pagbukas kag pagsarado sang TATC.
Nag-apelar man ini sa mga market goers ukon nagapanindahan nga temprano pa magkadto na sa TATC bangud alas 5:30 sang hapon sarado na ang merkado publiko.
