Nagakadapat ang nangin desisyon sang International Criminal Court (ICC) nga pagpamalibad sa interim release nga hingyo sang kampo ni anay Presidente Rodrigo Roa Duterte.
Sa interview sang Bombo Radyo kay Atty. Roden Taton, Dean of the Graduate School of Law sang San Sebastian College-Recoletos, iya ginpahayag nga mabug-at ang mga kaso batuk sa anay Presidente sa diin suno sa iya, indi ini pwede nga mahilway bangud sa posibilidad nga maapektuhan ang imbestigasyon.
Suno kay Atty. Taton, isa pa sa kaangay nagpalain sa Internation Criminal Court amo ang mga pahayag sang kabataan sang anay presidente nga ginkidnapp ini kag wala nag-agi sa due process.
Pahayag nya, sa pihak sang mga alegasyon sang kidnapping, ginbaton man sang kampo ni Duterte ang desisyon, apang nagasiling ang mga ini nga indi ini insakto. Liwat sila nga magaapela sa nasambit nga korte para sa temporaryo nga kahilwayan sang anay presidente.
Dugang pa sang natungdan, ang nasambit nga desisyon ang nagapakita nga seryoso ang international Criminal Court sa imbestigasyon. May posibilidad pa na magbag-o ang desisyon sa palaabuton, apang kinahanglan sang matibay nga kabangdanan.
