ROXAS CITY – May limitasyon ang function sang mangin deputized agent nga ipaidalum sa training sang Land Transportation Office 6.
Ini ang pagpaathag ni Riza Otayde, information officer sang LTO-6 sa reklamo sang mga legal franchise holders sang L300 van angut sa mga tourist van nga nagapang-pick up sang pasahero.
Suno kay Otayde nga indi mahimo makapangdakup ang mga deputized agent sang LTO Region 6 sa mga colorum nga van bangud limitado lamang ang ila nga function.
Ginklaro man sini nga ang mahimo lamang nga mapaidalum sa training sang talatapan agud mangin deputized agent amo ang regular nga empleyado sang gobyerno kasubong sang pulis kag traffic auxiliary kag indi lakip diri ang mga job hire/order employees.
Kalakip sa function sang mga deputized agent ang pagvalidate sa makuha nga report angut sa mga colorum nga van nga nagabiyahe sa syudad sang Roxas kag ang pagpalab-ot sini sa LTO Regional Enforcement Team nga amo ang magapatigayon sang operasyon.
Samtang ginpanindugan naman ni Otayde nga indi mahimo nga makapang-pick up sang pasahero ang mga tourist van, bangud may booking na ini sa mga resorts ukon hotels.
