Ginkondena sang Department of National Defense (DND) ang akusasyon sang China nga ang mga tropa sang Pilipinas nagahaboy sang basura sa Ayungin Shoal.
Suno kay Defense Secretary Gilberto Teodoro Jr. wala sang kamatuoran ang alegasyon kag ginhangkat niya ang China nga magpakita sang klaro nga ebidensya agud mapamatud-an ang ila mga pahayag.
Ini nga reaksyon sang secretary matapos magpagwa ang Chinese state media sang CCTV video nga kun sa diin ginapakita nga ang mga Pilipino nga sundalo sakay sang BRP Sierra Madre amu ang nagasunog sang mga materyales sa deck kag ginahaboy ang mga kalawangon nga container sa palibot sang lugar.
Apang, para sa DND, indi ini matuod kag ginpahayag ni Teodoro nga kun seryoso ang China sa ila akusasyon, dapat nila ini mapamatud-an sa husto nga paagi.
Ang Second Thomas Shoal ukon Ayungin Shoal makita sa 105 nautical miles sa west sang Palawan kag isa ini sa siyam ka maritime features nga ginakilala nga sakop sang Pilipinas sa Spratly Islands.
Sa nauna nga mga report, ginpahayag sang mga otoridad sang Pilipinas nga nakakita sila sang cyanide sa mga nakumpiskar nga botelya halin sa mga barko sang China malapit sa shoal sang Oktubre.
Ang cyanide isa ka makahilo nga kemikal nga ginagamit sa ilegal nga pagpangisda nga nagawasak sang coral reefs.
Samtang, ginsiling ni Teodoro nga ang China ang mas responsable sa mga ilegal nga aksyon sa ginaagawan nga kadagatan.
