Ginalantaw sa karon nga motibo sang mga katapo sang kapulisan sang President Roxas ang pagpangimon ukon “Crime of Passion” sa nagluntad nga pagpang-luthang sa isa ka lalaki sa Sitio Bongyod gamay, Barangay Viscaya, President Roxas, Capiz.
Ginkilala ang biktima kay alyas “Ricky”, 36-anyos kag residente sang Brgy. Hipona, Pontevedra, Capiz.
Sa interview sang Bombo Radyo kay PMAJ. Alfred De Leon, hepe sang President Roxas MPS, ginpahayag sini naga-inom-inom ang biktima kaupod ang mga utod kag bayaw sang live in partner sini nga ginkilala kay alyas “Amy” sang tinalikdan nga gab-i sang Oktubre 31.
Dugang pa ni De Leon, takna alas-10:00 sang gab-i, papauli na kuntani sakay sang motorsiklo sanday Ricky kag Amy sang hinali nalang nga may nagluntad nga paglupok sang armas-luthang sa lugar.
Natalupangdan nalang ni Amy nga may igo na sang bala gikan sa ginaalegar nga 12 gauge nga armas-luthang si Ricky.
Gilayon naman nga ginpadangat sa ospital si Ricky nga nag-angkon sang pilas sa nawala nga butkon, duha sa dughan, kag isa sa ilok sini.
Sa karon, yara na ini istable nga kondisyon kag padayon pa ang imbestigasyon sang kapulisan sa nasambit nga insidente.
