Padayon ang imbestigasyon sang mga otoridad sa pagpaluthang patay sa katapo sang Philippine Army sa sulod sang Camp General Macario Peralta sa Jamindan, Capiz.
Ang biktima amo si Private First Class Wencel Jay Puntuan, legal nga pang-edaron kag residente ng Purok 2, Brgy. Cabpangi, Libungan, Cotabato.
Samtang ang Suspek amo si Private First Class Rosarjoe Manajero, residente sang Datu Odin Sinsuat, Maguindanao del Norte.
Sa interview sang Bombo Radyo kay Captain Jessi Jun Ebalan, Chief sang 3rd Infantry Division Public Affairs Office, iya ginpahayag nga magka-upod nga nag-inum-inum ang biktima kag suspek antes ang insidente.
Suno kay Ebalan, sang yara na impluwesya sang makahulubog nga ilimnon si Manajero nagpauli ini sa iya barracks, kag didto niya ginkuha ang iya service firearm kag ginluthang si Puntuan.
Gilayon naman nga gindala sa ospital si Puntuan apang gindeklara nga dead on arrival.
Sa subong, yara na sa kustodiya sang Jamindan PNP ang suspek kag magapangatubang sang nagakaigo nga kaso.
