Padayon nga ginaimbestigaran sang mga katapo sang kapulisan ang nagluntad nga pagpangluthang sa operation manager sang Capiz Sugar Central sa Barangay Poblacion, President Roxas, Capiz.
Sa interview sang Bombo Radyo kay Police Captain Joebert De los Reyes, Officer in charge sang President Roxas Municipal Police Station, iya ginpahayag nga may yara na sang mga persons of interest ang ila talatapan kaangut sa insidente.
Suno kay De los Reyes, ila man nga pagakuhaon ang pila ka mga CCTV footages sa lugar agud nga makabulig sa imbestigasyon.
Nahibaluan nga yara sa sulod sang staff house ang biktima agud mabukas kuntani sang pirtahan sang hinali lang nga gintiro ini sang wala pa makilan-an nga indibidwal.
Bangud sini,nag-angkon sang pilas ang biktima nga gilayun ginpadangat sa Rural Health Unit sang banwa agud madapatan sang pagbulong,apang sa gilayon man nga isaylo sa pinakamalapit nga ospital para sa nagakaigo nga atensyon medikal.
Narekober naman sang mga otoridad sa ginluntaran sang insidente ang tatlo ka bala kag 1 ka deformed slug sang .45 Caliber Pistol, duha ka bala sang Cal. 9mm , kag isa ka bala sang 12 Gauge Shotgun.
Sa subong, nagalaum ang natungdan nga gilayon nila nga masolbar ang kaso kag madakpan ang responsable sa nasambit nga krimen.
