ROXAS CITY – Ginkumpirmar ni Punong Barangay Manuel ‘Bongbong’ Aninang sang Barangay Olotayan nga ginbawal na ang pagpasulod sang baboy nga nagikan sa probinsya sang Masbate.
Sa interview sang Bombo Radyo kay PB Aninang, ang pagbawal sang Masbate nagsugod sang tinalikdan nga bulan kun sa diin nagpadala sang sulat ang Coast Guard nga indi na makadala sang baboy ang mga sakayan nagikan sa Masbate matapos gindumilian ini sang Gobernador sang nasambit nga probinsya.
Ang rason suno diri sang pagbawal sang gobyerno sang Masbate bangud sa kulang man ang supply sang baboy sa nasambit nga probinsya.
Apang nagapati si Aninang nga may ara sa gihapon sang may nagapalusot nagikan sa Masbate apang wala ini nagadungka sa Banica Port bangud istrikto ini sa mga dokumento kag ginatsekyar sang maayo ang baboy.
Suno pa kay Aninang, nagapabilin sa gihapon nga kulang ang supply sang baboy sa probinsya kag ila ginahimo nga remedyo amu ang pagkuha sa iban nga lugar kaangay sa Cebu.
