Target sang pamunuan sang Department of Education nga magpaubra sang masobra 105,000 ka mga classrooms sa pungsod pamaagi sang public-private partnership.
Ginhimo ni Education Secretary Sonny Angara kadungan sang pag-umpisa sang klase subong nga adlaw sa pungsod.
Sa isa ka interview, ginsiling ni Angara nga dako nga pagpanghangkat sa ila ang madugay na nga infrastructure gap sa mga pampubliko nga buluthuan sa pungsod.
Bangud sini, ginaduso sang iya nga pagdumala ang public-private partnership nga nagabalor sang bilyones agud mahatagan sang solusyon ang amo nga krisis.
Ang amo nga balor ang plano nga utangon sang Pilipinas kag sa sulod sang pulo ka tuig, amat-amat nga baydan sang gobyerno.
Nagapati ang tiglikom nga panahon na nga himuon agud indi maulihi ang sektor sang edukasyon sang Pilipinas.
Base sa datos sang ahensya, magalab-ot sa gihapon sa 165,000 ka mga hulot-klasehan ang classroom backlog sa bug-os nga pungsod nga kinahanglan sang gilayon nga solusyon.
