ROXAS CITY – Ginkumpirma sang punong barangay sang Barangay Cagay, sining syudad nga ginpull-out na sang security agency ang nabilin nga apat ka mga security guards sa balay kag talatapan ni Patroceño Don Chiyuto.
Ginpahayag ni Kapitan Arthur Aragon, nagpakigkita sa iya kahapon ang inspector sang security agency kag nagwitness ini nga nagbiya ang mga security guards nga wala sang dala nga anuman nga gamit.
Suno pa sa opisyal nga wala na sang anuman nga gamit nga nabilin sa balay sang CEO sang double your money investment scheme, bangud sang nagligad nga Sabado nga adlaw ginpanghatag na ni Chiyuto sa iban nga mga pumuluyo ang mga kagamitan sa diin pila sa nakaambit diri ang iya mga tanod nga nakakuha sang 5 ka plastic nga bangko nga ila gindala sa ila mga balay.
Ang nabilin na lamang sa sulod sang balay nga gintrangkahan bangud wala na sang tawo amo ang salakyan ni Chiyuto.
Aminado si Kapitan Aragon nga na-curious ini sang nakita nga wala na sang nabilin nga kagamitan sa balay ni Chiyuto.
Apang ginpalab-ot sa iya nga maga-ilis sang bag-o nga kagamitan si Chiyuto.
Samtang kasunod sang pagsarado sang balay ni Chiyuto ang pagkadula sang nagatumpok nga mga tawo kag pagsarado sang pila ka mga tiyangge malapit sa lugar.
