Liwat nga nagpanawagan si National Food Authority (NFA) Administration Lary Lacson sa Local Government Units (LGU’s) nga dasigon ang pagpull-out sang reserba nga bugas sa idalum sang gindeklarar nga national food security emergency agud mapahalog ang mga bodega sini kag makabakal sang mga humay nga makabulig sa pangabuy-anan sang mga mangunguma.
Suno kay Lacson, ini man ang tion sang mga LGU’s agud makabakal kag makapulos sa barato nga bugas ang ila mga nasakupan.
Sa idalum sang national food security, mahimo nga magbaligya sang reserba nga bugas sang NFA ang mga LGU’s, mga ahensya sang gobyerno kag government owned and controlled corporation pinaagi sang Food Terminal Inc. sa presyo nga P33.00 tubtob P35.00 kada kilo.
Dugang pa sini nga importante suno diri ang amu nga presyo sa pagsiguro sang seguridad sang pagkaon sa pungsod kag patas nga presyuhan sa madamo nga bumalakal kag producer.
Sa idalum sang layi, ang NFA indi mahimo nga magpasilabot sa merkado agud mapanubo ang presyo para sa mga pigado nga consumers subong man suno sa rekomendasyon sang National Price Coordinating Council, ginmando sang Department of Agriculture (DA) ang pagpaguha sang reserba nga bugas sang NFA sa LGU’s kag iban pa nga ahensya sang gobyerno agud mabuligan ang gulpi nga pagtaas sang presyo sang bugas kag mabalik sa anay presyo sini kaangay sadtong Hulyo 2023.
Matandaan nga nagsugod nga magtaas ang presyo sang bugas sadtong Hulyo 2023 bangud sa pagsaka sang pangpungsudnon nga presyo matapos gindumilian sang India ang pag-export sang non-basmati rice sadtong Agosto sang nasambit nga tuig.
Samtang nadugangan pa ini bangud nagbaskog ang demanda dala sang wala ginalauman nga El Nino phenomenon sadtong una nga bulan sang 2024.
