Ginpanawagan ni Sen. Benigno “Bam” Aquino ang maid-id nga pagrepaso sa paggasto sang Department of Public Works and Highways (DPWH) sa P360 billion nga flood control fund subong nga tuig, sa tunga sang nagapadayon nga problema sa pagbaha sa madamo nga bahin sang pungsod.
Sa gin-file nga resolution, ginhingyo ni Aquino ang mga komitiba sang Senado nga magpatigayon sang imbestigasyon agud mahibaluan kon bala epektibo ang mga proyekto sang DPWH kag kon bala nagakadto sa husto nga lugar ang mga pondo.
Suno sa mamalidha, humalin 2009 tubtub 2024, naglab-ot na sa P1.47 trillion ang kabug-usan nga flood control budget, apang nagapabilin nga bulnerable sa pagbaha ang madamo nga mga komunidad.
Magluwas sa resolusyon, nagtuhaw man ang mga report sang ginaalegar peke nga flood control projects nga nagapabor sa mga pinili nga kontraktor.
Sa separado nga imbestigasyon sang Senate Blue Ribbon Committee, nakit-an ang halos P100 bilyones nga balor sang mga proyekto nga posible may mga anomalya, lakip na ang mga proyekto nga wala nahuman, indi kinahanglan, ukon liwat-liwat sa amo man nga lugar.
Ginsambit ni Aquino ang importansya sang transparency kag accountability sa paggasto sang pundo, ilabi na nga direkta nga ginabatyag sang mga pumuluyo ang epekto sang baha—halin sa pagkaguba sang propiedad tubtob sa katalagman sa kabuhi.
Ginalauman nga istoryahan sang Senado ang resolusyon sa masunod nga session, bangud nagapadayon ang pag-ulan kag pagbaha sa pila ka mga rehiyon sang pungsod.
