ROXAS CITY – Nangin generally peaceful ang pagselebrar sang ika-37 nga founding anniversary sa syudad sang Roxas sumugod Mayo 10 tubtob 12, 2024.
Sa interview sang Bombo Radyo kay PSMS. Ramil A. Archangeles Police Information Officer sang Roxas City PNP, ginpahayag sini nga ang nasambit nga selebrasyon ang gin-ugyunan sang nagkalain-lain nga ahensya sang gobyerno agud mapabilin ang kalinong kag katawhay sa syudad ilabi na ang seguridad sa capiznon subong man sa mga dumuluong.
Suno kay PSMS Archangeles, yara ang presensya sang katapo sang Philippine Coast Guard (PCG) Roxas, Roxas City Emergency Response Team (RCERT), Highway Patrol Group (HPG), Bureau of Fire Protection (BFP), Barangay Peacekeeping Action Teams (BPATs), kag madamo pa.
Ginpahayag man sini nga nangin maayo ang resulta sang selebrasyon kag wala sang dalagkuan nga mga insidente ang nabalhag sa nagkalain-lain nga venue nga ginpahamtangan.
Pila lamang sa mga magagmay nga insidente ang natabo kaangay sang nagkalalipong bangud sa tuman ka init apang gilayon man ini narespondihan sang mga medical teams nga yara sa lugar.
Nagpalab-ot man ini sang pagpasalamat sa tanan nga naghatag sang kooperasyon agud mangin madinalag-on ang amu nga selebrasyon.
