ROXAS CITY – Ginklaro ni Capiz Provincial Disaster Risk Reduction and Management Office (PDRRMO) Head Judy Grace Pelaez nga magapabilin ang mga pagsulundan sang gobyerno-probinsiyal sa pagbaton sang mga magapauli nga mga Returning Overseas Filipinos kag Locally-Stranded Individuals (LSI’s).
Ini ang kasunod sang ginpaguwa nga operational guidelines sang National Inter-Agency Task Force (IATF) kun sa diin nasaad nga ang tanan nga ROF’s nga maga-negatibo sa real-time polymerase chain reaction (RT-PCR) test sa Manila ang indi na dapat pag-ipaidalom sa swab test kag facility quarantine sa ila pagpauli sa probinsiya.
Suno kay Pelaez nga dako nga risgo ang nasambit nga pagsulundan gani magaapelar sila sa IATF nga kun mahimo, magaagi gihapon sa maid-id nga pagsulundan ang mga magapauli nga ROF’s.
Ginpahayag sini nga samtang nagahulat pa sila sang pinal nga mandato, magapabilin ang pagsulundan sang gobyerno-probinsiyal kun sa diin magapaidalom gid sa 14-day quarantine ang magapauli nga mga OFW’s.
Suno diri nga nagpanugyan man ang Office of the Civil Defense (OCD) nga ipatuman anay ang karon nga pagsulundan sa probinsiya samtang ginahulat pa ang pag-transmit sang operational guidelines sa regional IATF.
Sa karon, nagdangat na sa 2, 229 ka mga OFW’s ang nakapauli sa Capiz samtang nagdangat naman sa 6, 409 ang nakapauli na nga mga LSI’s.
