Gintawag sang General Alliance of Workers Association nga isa lang ka taktika ang pagsuspend sa dugang pamasahe agud maliso ang istorya may kaangtanan sa dugang sweldo para sa mga mamumugon.
Sa interview sang Bombo Radyo kay Wennie Sancho, Secretary General sang General Alliance of Workers Association, iya ginpahayag nga may positibo nga epekto ang pag-amlig sang gobyerno sa ikaayo sa mga commuters apang tungod sini daw kaangay nga wala na ginahatagan sang atensyon ang madugay na nga panawagan sang mga mamumugon nga pataasan ang panawagan nga dugang nga sweldo.
Suno sa iya, dako ang mabulig kuntani sang dugang nga sweldo sang mamumugon agud mapakapahagan-hagan sang mataas nga presyo sang mga balaklon tuga sang padayon nga tensyon sa Middle East.
Dugang pa niya, ang kakulangan sang tikang sang gobyerno nahanungod sa wage increase nagapakita nga indi ini prayoridad ang sektor sang mga mamumugon.
Nagpanawagan ang natungdan sa gobyerno nga untaton ang “human welfare politics” kag maghimo sang konkreto nga mga tikang agud masabat ang nagasaka nga gasto sa pagpangabuhi.
Sa pihak sini, ginpahayag sang grupo nga indi dapat magtapos ang gobyerno sa temporaryo nga solusyon, kundi kinahanglan ang malawig kag tayuyon nga pamaagi agud masolusyunan ang problema sang mga mamumugon kag publiko.
