Gintuad ni Commission on Elections Chairman (COMELEC) George Erwin Garcia nga ang pagpaiway sa ginapatigayon nga pag-imprenta sang mga balota ang ‘first-time’ nga ginhimo sang komisyon.
Ini ang bangud sa Temporary Restraining Order (TRO) nga ginpaguwa sang Korte Suprema pag-abot sa pag-diskwalipika sa mga pila ka kandidato, para sa national kag local elections, rason nga gilayon naman ini nga ginsunod sang poll body.
Ang tanan nga preparasyon nga may kaangtanan sa balota ang maapektuhan bangud sa pagpauntat sang pag-imprenta. Halimbawa na lamang ang halos yara sa 6 million nga mga balota ang na-imprenta nga nauyang bangud ini ang indi na magamit pa kag kinahanglan anay nila ini nga i-inventory agud ipasa sa Commission on Audit (COA). Ginabanta nga yara sa halos 150 millon naman ang nauyang nga kwarta para diri.
Suno kay COMELEC Chairman Garcia, tanan nga preparasyon nga may kaangtanan sa pag-imprenta sang mga balota ang kinahanglan nga bag-uhon, kasubong sang Election Management System, ang database sang komisyon, serialization sang kada pangalan sa balota kag ang bag-o nga ballot face template nga iga-publish. Kag bangud sa pag-proseso liwat sang mga ini, ginsiling ni Garcia nga dalayon na nga nag-angkon sang delay ang pag-imprenta sang mga balota kag tanan nga preparasyon para diri.
Kaangut pa sini, gin-anunsiyo man ni COMELEC Chairman Garcia nga pati ang mock elections nga matabo kun tani subong nga Enero 18 ang maatras na sa Enero 25 agud makapain pa sang oras sa pag-imprenta sang mga balota. Lauman man sun okay Garcia ang pagpaguwa sang bag-o nga ballot face template sa Lunes ukon Martes sa masunod nga semana. Ginpasiguro naman ni Garcia ang publiko nga ang iban pa nga preparasyon para sa eleksyon ang magapadayon sa gihapon kag indi ini maapektuhan.
