ROXAS CITY – Naalarma na ang Provincial Health Office sa padayun nga pagtaas sa numero sang mga recorded cases sang Human-Immunodeficiency Virus (HIV-AIDS) sa probinsiya sang Capiz.
Sa interview ng Bombo Radyo kay Dr. Evelyn Bolido, medical specialist IV sang PHO, ginpahayag sini nga ba-se sa pinakaulihi nga rekord sang talatapan, nagalab-ot na sa 116 ang kumpirmado sa nasambit nga sakit.
Sa nasambit nga numero sang mga confirmed cases, 13 ang babae kag 103 ang lalaki.
Bangud diri, naghimo na sang nagakaigo nga tikang ang PHO para indi madugangan ang numero sang mga HIV-AIDS sa Capiz, kasubong sa pagpasanyog pa sang kampanya sa mga eskwelahan.
Nahibaluan nga kadam-an sa mga nagpositibo sa HIV-AIDS ang mga kalalakinhan nga nagapakighilawas sa kasubong nga lalaki.
Samantala, bukas na ang Satellite Treatment Hub sa City Health Office sa Roxas City sa mga luyag mahibaluan ang ila status sa nasambit nga sakit.
Antes magpa-blood test ang pasyente, magapaidalum pa ini sa counselling.
Ginpasiguro man ni Dr. Bolido sa mga pasyente nga mangin strictly confidential ang pangalan sang mga ini.
