Ginapatutukan ni Senator Joel Villanueva sa gobyerno ang pagtaas sang numero sang underemployment sa pungsod.
Bisan pa nga may pagnubo sa numero sang mga wala sang trabaho sa pungsod nga yara na sa 3.1% ukon kabaylo sang 1.62 million nga indibidwal sang tinalikdan nga Hunyo 2024 humalin sa anay 4.1% ukon 2.11 million sang Mayo 2024, nagtaas naman ang underemployment sa 12.1% ukon nasa 6.08 million sa bulan sang Hunyo humalin sa 9.9% ukon 4.82 million sadtong Mayo.
Gintumod ni Villanueva nga ang tayuyon nga pagtaas sa underemployment ang indikasyon nga padayon man ang job-skills mismatch kag kadulaan sang kalidad nga trabaho sa pungsod.
Bangud sa ini nga problema, liwat naman nga nagpanawagan si Villanueva sa mga kapwa mamalidha nga aprubahan ang Senate Bill 2587 ukon ang Enterprise-Based Education and Training (EBET) Framework Act nga ginapatihan nga magatuman sa problema sa job-skills mismatch sa mga manggagawa.
Kalakip ang panukala nga ini sa priority measure sang administrasyon nga may tuyo nga pabaskugon ang skills sang mga workforce pamaagi sang mga paghanas, apprenticeship, kag upskilling.
Nagalaum naman ang senador nga mangin batas na ini sa pinakaposible nga kahigayunan.
