Hugot nga ginpamatukan sang Palasyo ang nangin pahayag ni Vice President Sara Duterte may kaangtanan sa sitwasyon sang pungsod kag posibilidad sang 2028 presidential elections.
Gintawag ni Palace Press Officer Claire Castro nga “bwitre” ang Vice President matapos sini nga magpamangkot kun may “Pilipinas” pa bala pag-abot sang 2028 bangud sa kadamo sang problema sa idalom sang administrasyon subong.
Suno kay Castro, nagapabilin nga bulag si Duterte sa mga ginahimo ni President Ferdinand Marcos Jr. kag sang iya nga administrasyon bangud indi sini luyag nga kilalahon ang mga programa kag proyekto sang gobyerno. Dugang pa niya, indi na bag-o ang kasubong nga pahayag halin sa Vice President.
Sa isa ka interview, ginsiling ni Duterte nga indi niya masigurado ang iya nga plano para sa 2028 bangud mahimo nga wala na sang maayos nga pungsod nga paga-istoryahan sa amo nga tyempo.
Ginsambit man niya ang mga ginapahayag nga isyu sang korapsyon, kakulangan sa mga dalagkuan nga proyekto, kag posibilidad sang magamo nga gobyerno.
Hugot naman nga ginsiling ni Castro nga wala sang pulos kag indi makabulig ang kasubong nga mga pahayag kun indi ini pagdunganan sang aktibo nga partisipasyon sa mga programa sang gobyerno.
