Nagpaandam si Senate President Pro Tempore Panfilo “Ping” Lacson batuk sa ginatawag sini nga “homegrown traitors” ukon mga Pilipino nga handa magbaligya sang pungsod para sa personal nga interest.
Suno kay Lacson, sa iya masobra singkwenta ka tuig nga pagserbisyo sa gobyerno—nga halos katunga sini gin-usik niya saintelligence work magluwas sa technical intelligence, ang mga indibidwal nga luyag magbaligya sang impormasyon kag interes sang Pilipinas isa man ka daku nga pamahog sa seguridad sang pungsod.
Suno sa iya, ini ang kinaandan nga ginatumod nga “recruitment in place,” sa diin ang iban nga mga Pilipino mismo nangin traidor batok sa ila pungsod.
Matandaan nga sa ginpatigayon nga hearing sang Commission on Appointments sang Miyerkules, Pebrero 4, hugot nga ginpamatukan ni Lacson ang suhestyon ni Sen.Rodante Marcoleta nga isungka sang Pilipinas ang Kalayaan Island Group (KIG).
Ginpanindugan sang senador, katumbas ang pagsungka sa Kalayaan Island Group indi lamang sang isa ka teritoryo kundi sa bahin sang Luzon ukon bisan sa bug-os nga pungsod.
Samtang, sa subong, may mga Pinoy nga nagapuyo sa Kalayaan Island Group nga isa ka banwa sa Palawan nga wala untat nga ginapangapinan sang mga Pinoy nga may dignidad kag pagkilala sa teritoryo nga dapat iya sang Pilipinas.
