Nagapawagan ang grupo sang Pamalakaya-Panay nga repasuhon ang plano nga pagpatuman sang tatlo ka bulan nga fishing ban sa Visayan Sea bangud posible epekto sini sa pangabuhian sang magagmay nga mangingisda.
Sa interview sang Bombo Radyo kay Nathaniel Baga-ot, spokesperson sang Pamalakaya-Panay, iya ginpahayag nga ginabulubanta nga 180,000 ka magagmay nga mangingisda ang posible nga maapektuhan sa rehiyon sang amo nga fishing ban kag mahimo nga maga-atubang sang problema sa pangabuhian kag kakulang sang pagkaon.
Suno kay Baga-ot, ginakwestyon sini kon ngaa ang magagmay nga mangingisda lamang ang ginadumilian sa pagpangisda samtang nagapadayon ang operasyon sang mga commercial fishing vessel.
Dugang pa sini, indi lamang ang mga mangingisda ang maapektuhan kundi pati ang mga konsumidor bangud posible nga magkulang ang suplay sang isda kag magtaas ang presyo sini.
Nahibaluan nga ang tatlo ka bulan nga fishing ban ginapatuman agud makahatag sang tion sa mga isda nga magdamo liwat kag makapadamo sang ila populasyon sa Visayan Sea.











