Naghabok ang numero sang pamilya nga Pinoy nga nakabatyag sang involuntary hunger sa nakaligad nga tatlo ka bulan sa 27.2%, suno sa pinakaulihi nga survey sang Social Weather Stations (SWS) nga ginkomisyon sang Stratbase Group.
Ang pinakaulihi nga numero ang mas mataas sa 25.9% nga nabalhag sadtong December, 2024 kag ang pinakamataas sumugod sang ma-post ang record high nga 30.7% sang COVID-19 pandemic sadtong September 2020.
Ginpatigayon halin Marso 15 tubtob 20, 2025, nagaguwa sa survey nga ang mga nakaeksperyensya sang gutom sa bulan nga ini ang mas mataas sang 6 points kun ikumparar sa 21.2% sadtong Pebrero.
Ang involuntary hunger ang nagakahulugan sang “pagiging gutom kag wala sang makaon”.
Ang pinakamataas nga hunger percentage na-record sa Visayas sa 33.7%.
Ginsundan ini sang Metro Manila sa 28.3%, Mindanao sa 27.3%, kag Balance Luzon sa 24%.
Suno sa SWS survey, ang pagtaas sa hunger rate sa Marso ang bangud sa mga pagtaas sa Visayas, Balance Luzon, kag Mindanao, nga gin-updan sang steady score sa Metro Manila.
Sa 27.2% pamilya nga nakabatyag sang gutom, 21% ang moderate hunger samtang 6.2% ang nakaeksperyensya sang severe hunger.
Ang moderate hunger para sa mga nakabatyag sang gutom nga “isa ka beses lamang” ukon “pila ka beses” sa nakaligad nga tatlo ka bulan.
Samtang, ang severe hunger amu ang mga nakabatyag sang “masami” ukon “permi” sa nakaligad nga tatlo ka bulan.
Ang survey ang ginpatigayon pinaagi sa face-to-face interviews sa 1,800 registered voters sa bug-os nga pungsod. Ini ang may sampling error margins nga ±2.31% para sa national percentages, ±3.27% sa Balance Luzon, kag tig- ±5.66% para sa Metro Manila, Visayas kag Mindanao.
