MAAYON CAPIZ – Desido nga magpasaka sang nagakaigo nga kaso ang mga utod sang babaye nga ginlabo-patay sang ila man nga magulang sa Sitio Minuro, Barangay West Villaflores, Maayon Capiz.
Matandaan nga ginkilala ang napatay nga si Jennelyn Botis, 37-anyos samtang ang nagkalapilasan ang ginkilala nga sanday Lea Alcayde, 30-anyos kag Gilbert Morallos, 48-anyos kag ang suspek amu si Jonilon Morallos, 46-anyos lunsay residente sang nasambit nga lugar.
Sa interview sang Bombo Radyo kay Lea hinipo sa ila nga mag-utod, ginpahayag sini nga sang natabo ang insidente nagapanyapon sila sang biktima sa ila balay sang may nabatian sila nga nagabinaisay.
Bangud sini, gilayon nila nga ginguha agud hibaluon kag didto ginapahayag nga naakig si Gilbert sa suspek bangud ginlampusan sini ang iya traysikol nga yara sa guha sang iya balay.
Suno pa diri nga may yara na sang gina-uyatan nga binangon ang suspek sang nagabinaisay pa lamang sila ni Gilbert.
Bangud sa mainit nga pagsinabtanay hinali na lamang nga ginpalapitan sang suspek si Gilbert kag ginlabo.
Gilayon naman ini nga gintinguhaan nga tambagan sang biktima pinaagi sa pag-aba sa likod sang suspek apang natigayon ini nga matumba kag didto ginapahayag nga nagkadto sa iya ang atensyon sang suspek kabangdanan agud malab-an sang makapila ka beses.
Nag-angkon sang pilas ang biktima sa iya liog, kili-kili kung sa diin naglapos ini sa iya tagipusuon kag iban pa nga parte sang iya lawas.
Gintinguhaan pa sang mag-utod nga dal-on sa Bailan District Hospital ang biktima para kun tani sa nagakaigo nga pagbulong apang gindeklarar ini nga dead on arrival sang doktor.
Samtang ang suspek naman ginpadangat sang iya mga tiya sa Roxas Memorial Provincial Hospital bangud sa pilas nga naagum matapos malampusan sang matig-a nga bagay ni Gilbert.
