ROXAS CITY – Wala pa sang klaro nga impormasyon nga ginpalab-ot ang pamunuan sang Starlite Ferries kun diin na kutob ang ila ginahimo nga tikang angut sa ginaalegar paglumpat sang isa ka Capizeño sa ila barko nga MV Starlite Saturn sa kadagatan nga sakup sang Romblon.
Suno kay Mrs. Emelia Layson, iloy sang biktima nga si Rommel Layson sang Barangay Poblacion, Jamindan nga wala pa sila sang anuman nga impormasyon nga nabaton gikan sa tagdumalahan sang Starlite Ferries angut sa nadangatan sang imbestigasyon sang kumpaniya sa kaso sang iya anak.
Na-estorya man sang iloy ang upod sang iya anak sa diin nagaguwa nga kasubong nagaproblema si Rommel bangud nagsuprer sang balatian nga dengue ang iya utod kag amay.
Apang isa ka adlaw antes natabo ang ginaalegar paglumpat sang biktima, nakapadala pa ini sang kuwarta sa iya iloy kag nagpromesa nga dugangan sa masunod nga mga inadlaw.
Ginkumpirma man sang ginang nga may nakalab-ot nga impormasyon nga makaduha ka beses naglumpat ang iya anak sa diin sang una nga paglumpat, narescue pa ini apang sang ikaduha wala na ini ma-rescue.
Kasunod sini nagpanawagan man ang ginang sa management sang Starlite Ferries nga buligan sila nga mahibaluan kun diin na sa karon ang ila anak.
Samtang disgustado si Tatay Roger Layson sa dalagan sang imbestigasyon sa kaso sang ila anak.
Masakit man sa ila ang natabo, apang ginahinyo sa Starlite ferries nga buligan sila, bangud pigado man ang ila pamilya.
Nahibaluan man gikan sa amay nga katuwang sini si Rommel sa ila pangabuhi sa diin ang biktima amo ang nagapa-eskwela sa iya mga utod.
