Mabatyagan karon ang kasubo sa pamilya sang mag-asawa nga Noli ‘’Totong’’ Navarro kag Juara ‘’Niknik’’ Navarro nga ginluthang-patay kagab-i sang ginatudlo suspek nga si Sultan Oquendo, chief tanod sang Barangay Hipona, Pontevedra, Capiz.
GinsiNdihan sang kandila sang pamilya sang mga biktima ang lugar nga ginluntaran sang krimen.
Indi pa halos makapati ang pamilya sang mag-asawa nga Navarro sa nadangatan sang ila himata sa diin nagasinggitan sila sang hustisya sa nangin kamatayon sang duha.
Mas ginpasangkad pa sang kapulisan ang hot pursuit operation batuk sa suspek nga madasig nagpalagyo matapos ang krimen.
Ba-se sa pagpangusisa sang Bombo News team sa mga residente nga antes ang krimen ginpaandaman na sang nagligad nga semana ang mag-asawa ni Kapitan Resty Oquendo nga indi na magbaligya sa kilid sang tulay, apang sang nagpamangkot ang duha sa mga pulis kun bawal, ginhambalan sila nga wala man sang problema kun magbaligya sila sa lugar.
May nagaguha man nga report sa Barangay Hipona, nga pila ka oras antes ang krimen, nakaangkon sang pagbaisay ang mag-amay nga Sultan nga yara sa impluwensiya sang makahulubog nga ilimnon kag Kapitan Resty Oquendo sa diin nagguha sa ila balay si Sultan para magpaliwa liwa.
Sa paglibot libot sini sakay sa motorsiklo, nakita sini ang mag-asawa nga Navarro kag wala sa kun anuman nga kumprontasyon nga natabo, iya ini ginpangluthang.
Ginpahayag nga matapos maluthangan ang mga biktima, ginpahog pa sini ang mga nakasaksi sa krimen.
Samtang napakig-angutan sang Bombo Radyo si Kagawad Romolo Jun-Jun Sanz, paryente sang biktima nga si NikNik sa barangay hall sang nasambit nga barangay.
Suno diri nga wala siya naka-responde sa lugar sang nagluntad ang krimen, bangud nagbantay ini sang punong.
Pagka-aga na lamang sini nahibaluan ang natabo kag ginkasubo sini ang nadangatan sang iya himata.
Aminado si Sans nga matunog ang pangalan ni Sultan nga ginatudlo sang kadam-an nga responsable sa kamatayon sang mag-asawa nga Navarro.
Apang indi pa matul-id kun ini gid man ang yara sa likod sang krimen.
Sa karon nagapanawagan si Sanz sa suspek nga magsungka na lamang kag atubangon ang nahimo nga kasal-anan agud indi magbug-at ang iya sentensiya.
