ROXAS CITY – Ginahulat pa tubtob sa karun sang pamilya Barrera, ang resulta sang imbestigasyon matapos ang pagbungguanay sang duha ka motorsiklo sa National Highway sa may bahin sang Barangay Agbalo, Panay, Capiz sang damlag lang.
Matandaan nga dead on the spot ang driver sang motorsiklo nga si Antonio Barrera 38-anyos residente sang Barangay Jolongajog, Pontevedra Capiz.
Sa interview sang Bombo Radyo kay Christopher Barrera, magulang sang biktima ginpahayag sini nga nagapanghimo sang furniture ang iya manghod kung sa diin ini ang palangabuy-anan.
Suno kay Christopher, masami nga may dala kag suksok nga helmet ang iya manghod kung magdrive sang motorsiklo apang natingala lamang ini nga sang adlaw nga nagluntad ang insidente wala ini sang dala kag suksok nga helmet.
Mahibaluan nga angkas sang biktima ang live-in partner sini nga Joevelyn Benid 51-anyos nga sa karun yara na sa istable nga kondisyon.
Dugang pa ni Christopher nga indi pa sila sa karun makadesisyon kung magapasaka sang kaso batuk sa nakabunggo sa iya manghod bangud ginahulat pa nila tubtob sa karun ang resulta sang imbestigasyon.
