ROXAS CITY – Magabaton sang mas o menus sa 5 million New Taiwan Dollar ukon P8.3 million nga kumpensasyon ang tagsa ka pamilya sang mangingisda nga Pinoy nga kalakip sa nangin biktima sang pagkarumpag sang tulay sa Taiwan sang damlag lamang.
Nahibaluan nga magahalin ang nasambit nga kumpensasyon sa Taiwan International Ports Corporation (TIPC).
Magluwas diri, magabaton man ang pamilya sang tatlo ka Pinoy nga napatay sa trahedya sang financial kag burial assistance gikan sa gobyerno sang Pilipinas kag ginaasikaso na sang Manila Economic and Cultural Office (MECO) ang pagpabalik sa pungsod sa bangkay sang mga mangingisda nga Pinoy.
Nagpalab-ot naman sang pagpakig-unong sa pamilya sang mga biktima sa Pilipinas kag Indonesia ang Ministry of Foreign Affairs sa Taiwan kag ginpasiguro nga magahatag sang assistance ang mga overseas offices sa nabilin nga pamilya sang mga biktima.
Samtang, nahibaluan nga magluwas sa pamilya sang mga napatay nga Pinoy fishermen magabaton man sang kumpensasyon ang iban nga mga mangingisda nga Pinoy nga napilasan sa nasambit nga trahedya.
