ROXAS CITY – Wala nagapati ang pamilya sang 23-anyos nga engineer nga nasapwan-patay sa Zarraga, Iloilo, nga nakuryente ini bangud wala sang paso nga nakit-an sa lawas sini.
Sa interview sang Bombo Radyo kay Rubin Daños, stepdad sang biktima, ginkakibot sini ang nabaton nga balita nga patay na ang iya bata.
Suno diri, wala sang paso nga makit-an sa lawas sang biktima apang may gaob sa tyan kag kamot sini.
Sa panaysayon ni Daños isa ka mabuot nga bata ang biktima kag madamo pa ini sang handum nga luyag maabot sa lamharon sini nga edad.
Matandaan nga nasapwan na nga wala na sang kabuhi si John Paul Tecson sa sulod sang kwarto sa ginatiniran sini nga boarding house sa Happy Homes Subd., Poblacion Ilaya, Zarraga takna 7:13.
Mahibaluan, nga sang bulan sang Abril nakasulod si Tecson bilang site engineer sa isa ka Telecommunication Company kag may proyekto sa Antique apang, nagatiner ini sa Iloilo bangud diri na nahamtang ang ila opisina.
Sa karon, igapaidalum sa autopsy examination ang bangkay sang biktima agud matumod na ang gintunaan sang iya kamatayon.
