ROXAS CITY – Liwat nga nagpahanumdum ang pamunuan sang Capiz Electric Cooperative (CAPELCO) sa mga konsumedor nga tun-an limitahan ang pagganmit sang kuryente ilabi na sa tion sang pick hour sumugod alas 6:00-11:00 sang gab-i, agud ang impact sang pagtaas sang rate mabuhinan.
Sa interview sang Bombo Radyo kay Engineer Edgar Diaz, CAPELCO General Manager, ginpahayag sini nga ang gulpi nga pagtaas sa pagsuluktan sa kuryente subong nga bulan tuga sang pagsaka sang demand sa paggamit sang kuryente.
Suno kay Engr. Diaz kung ikumparar sang tinalikdan nga bulan, nagnubo ini sang P1.776 per kilowatt hour bangud nagnubo ang generation charge sang power supply indi kaangay subong nga nagtaas sang P1.556 pkh per kilowatt hour.
Buot silingon nagtaas ang demand sang kuryente subong ilabi na nga nagamit sang malahalon nga planta agud matupungan kag mahatag ang supply sang kuryente nga kinahanglanon.
Bangud sini, madamo nga mga konsumedor ang nakibot bangud halos nagtriple ang ila ginbayad sa billing.
Pag-eksplekar ni Engr. Diaz, duha lamang ka butang ang mahimo pilian sang mga konsumedor.
Una, batunon ang pagtaas sa pagsuluktan sang billing ukon ma- eksperyensyahan ang power interruption ilabi sa tion sang pick hours bangud indi masarangan nga magsupply sang bastante nga kuryente sa tanan nga lugar.
Mahibaluan nga nagalab-ot sa P20.00-P32.00 kwh ang makaon nga kuryente sa tion nga nagapauyang gamit sang mga appliances ang konsumedor ikumparar sa regular nga oras kung sa diin nagakaon lamang ini sang P7.00-P12.00 kwh.
Dugang pa sini nga sila mismo sa Capelco, indi pabor sa pagsaka kag pagnubo sang pass on charges kaparehas sang generation bangud nagaapekto ini sa ila nga cash flow.
