Ginklaro ni Board Member Matteo Hachuela nga indi kaugalingon nga desisyon ang panawagan nga magbiya sa pwesto bilang pinuno sang CAPENRO si Atty. Emilyn Depon.
Ginpahayag sang opisyal nga ini ang panawagan sang Sangguniang Panlalawigan nga nag-ugat sa mga nangin declarasyon ni Atty. Depon nga wala nagsugid sang matood sang ginpatigayon ang committee hearing sa diin hugot sini nga ginapanindugan nga wala sang quarry operation sa banwa sang Dumarao sa pihak nga mismo ang alkalde sang banwa na ang nag-ako nga may quarry operation apang gin-untat lamang matapos nahibaluan nga kinahanglan pa ang permit sa provincial government.
Ginpanindugan ni Hachuela nga ang pinuno mismo sang Capenro ang nagpatalang sa ila nga mga board members bangud ginatindugan sini nga sa banwa lamang sang Sigma may yara sang ginpatigayon nga quarry operation.
Sa ginhimo sini nangin untruthful si Atty. Depon kag kasubong nga nadula na ang trust and confidence sa iya sang Sangguniang Panlalawigan.
Gin-athag pa sang opisyal nga wala sila sang kapasidad nga mapahalin sa pwesto si Depon bangud ang gobernador lamang nga amo ang appointing authority ang may gahum sa paghimo sini.
Apang nagadepende na kay Atty. Depon kun magpanaug ini sa pwesto, apang kuntani for delicadesa’s sake na lamang pamatian sini ang panawagan sang kadam-an.
