ROXAS CITY, CAPIZ- Ginpakigbanhin sang Market Administrator sang Teodoro Arcenas Trade Center, Roxas City nga ginhatagan sang nagakaigo nga igtalupangod ang panawagan sang mga market vendors nagikan sa Burgos Talipapa nga ginhalin sa amo nga merkado sa Roxas City Government.
Sa interview sang Bombo Radyo kay Mrs. Heloise Mendoza, ang nasambit nga administrador sang amo nga merkado, iya ginpahayag nga may ginpatigayon na sila nga pagsinapol kaupod si Roxas City Mayor Ronnie Dadivas kag City Councilor Bords Viterbo kag ginhinalaan ang may kaangtanan sa mga problema nga ginpalab-ot kag ginapanawagan sa ila nga talatapan.
Suno kay Mendoza, ang problema sang mga manugbaligya may kaangtanan sa ila nga pwesto ang ginaulikid gid rason nga maga-request ang alkalde sang engineer agud mahatagan sang nagakaigo nga solusyon ang problema sa madanlog nga baldusa kag barado nga kanal sang amo nga bahin sang merkado.
Dugang pa sini, pag-abot naman sa hinyo sini nga ihalin ang mga sidewalk vendors sa tagsa ka mga barangay padulong sa merkado publiko, may ginadihon na ang Roxas City Government agud nga mapatuman ang amo nga lihok apang gin-athag sini nga indi ini gilayon nga maimplemetar.
Pag-abot naman sa mga ginpahayag nga kinawatay sa sulod sang merkado, ginpahayag ni Mendoza nga masig-aligmat ang tagsa-tagsa bangud may posibilidad nga sila-sila lang man ang naga-interes sa tagsa-tagsa bangud nga may yara naman suno kay Mendoza sang security guard ang merkado.
Samtang, malipayon nga ginpakigbahin ni Mendoza nga ang nasambit nga pagsinapol nga ila ginpatigayon ang nagresulta sa isa ka madinalag-on nga paghinun-anon sang tagsa-tagsa. Ginasiguro naman sini sa tagsa ka mga manugbaligya nga kun may mga luyag nga ipalab-ot nga problema may kaangtanan sa dalagan sang pagbaligya sa merkado, ihutik lang sa iya agud nga mahatagan sang nagakaigo nga igtalupangod.
Interviewed by Bombo Francis Biñas
