ROXAS CITY – Handa ang grupo nga Panay Alliance Karapatan nga maghatag sang assistance sa driver sang trak nga nasal-an nga commanding officer sang Roger Mahinay Command, Komiteng rehiyon-Negros ng Communist Party of the Philippines-New People’s Army (CPP-NPA) sang militar kag PNP.
Ini ang ginpasiguro ni Reyland Vergara, secretary general sang Panay Alliance Karapatan sang ma-interview sang Bombo Radyo.
Suno kay Vergara, gina-demanda sang grupo sa militar kag PNP nga maghimo sang public apology kay Baltazar Saldo sang Barangay Sto. Angel, Dumalag, Capiz kag maghatag sang indemnification sa physical kag moral damages nga ila natuga sa kabuhi sang Capizeño driver, bangud sa epekto sang sala nga intelligence monitoring sang PNP kag AFP.
Nagapati ang human rights group nga may kinamatarung si Saldo nga ginlapas sang mga otoridad, gani nagakadapat lamang nga pasakaan sang panumbungon ang militar kag pulisya nga yara sa likod sini.
Ginapanindugan pa ni Vergara nga wala nagapati ang Panay Alliance Karapatan nga ang ginhimo sang PNP ang bilang pagsunod lamang sa ila mandatu.
Nagpakig-angut naman ang grupo sa pamilya Saldo nga nagpalab-ot sang ila kahandaan nga maghatag sang bulig pinaagi sa pagprovide sang abogado nga magabulig sa ila sa pagpasaka sang panumbungon.
Suno diri nga may malain nga epekto kay Saldo kag sa iya pamilya ang ginhimo nga pag-aresto diri, gani dapat lamang nga sabton sang militar kag pulisya ang resulta sang ila sala nga intelligence monitoring.
Indi man malayo suno kay Vergara nga nasilaw ang mga otoridad sa daku nga reward nga para sa wanted nga NPA commander nga si Virgilio Paragan nga ila nasal-an nga si Baltazar Saldo.
