ROXAS CITY, CAPIZ – Nagpatigayon sang inspeksyon sa Barangay X, Roxas City ang Chief Operating Officer sang Panay Railways Incorporated nga si Mr. Cesar Capellan kaupod ang mga personnel gikan sa Iloilo City.
Tinutuyo sang ila nga pagbisita nga ipaathag sa mga residente ang mga patakaran sang Panay Railways Incorporated ilabi na sa mga nagaistar sa area nga sakop sang nasambit nga Government-owned and Controlled Corporation.
Sa interview sang Bombo Radyo kay Punong Barangay Roberto Avelino sang Barangay X, iya ginkumpirma nga may gamay nga indi pagkasugot sa ginatindugan sang balay sang pila ka nagaistar nga sakop sang Panay Railways Incorporated.
Sa bulig sang mga opisyal sang barangay, ginpatigayon ang paghinun-anon kag pagsukat sa lugar agud maresolba ang isyu.
Suno kay PB Avelino, tatlo ka balay ang apektado kag ginhatagan sang kontrata agud malikawan ang indi pagkasugot.
Pahayag niya, isa sa mga residente ang madugay na nga wala nakabayad sa Panay Railways Incorporated nga isa man sa rason nga ginpadulungan.
Dugang pa sang natungdan, tanan nga nagaistar sa duta sang Panay Railways Incorporated may kontrata kag nagabayad. Ang mga kontrata nga ini ang renewable tubtob wala pa ginagamit sang tag-iya ang duta.
Pahayag pa ni PB Avelino nga wala pa sang plano nga gamiton sang Panay Railways Incorporated ang lugar kag panugyan sini sa mga residente nga likawan ang kinagamo kag kun may problema, idangop sa barangay para sa maayo nga pagtamdanay.
– Interviewed by: Bombo Sunnie Mae Batencila
