ROXAS CITY-Pilason ang 62-anyos nga panday matapos nga ginlabo sa Barangay Cabugao, Ivisan Capiz.
Ginkilala ang biktima nga si Vivencio Occeño, residente sang nasambit nga lugar.
Sandig sa inisyal nga imbestigasyon sang Ivisan Municipal Police Station nagaguwa nga upod inom ang biktima kag suspek nga si Ronnie Vista, 51-anyos residente sang amo man nga lugar samtang nagapamanday sang balay.
Apang may nagluntad nga binaisay sa tunga sang biktima kag suspek matapos nga ginsaway sang biktima ang suspek sang magakuha ini sang sumsuman.
Ginaalegar nga nagpauli sa ila nga panimalay ang suspek apang sa pagbalik sini may dala na ini sang sanduko.
Gilayon ini nga ginpalapitan sang biktima nga may dala nga kawayan kun sa diin ginlabo ini sang suspek sa guya kag sa butkon.//
Madasig nga gindala sa Roxas Memorial Provincial Hospital ang biktima kag padayon nga ginabulong.
Samtang ang suspek ang yara na sa karsel sang Ivisan Municipal Police Station
matapos nga boluntaryo nga nagsungka.
