Apektado ang pangabuhianan sang mga mangingisda sa palibot sang Taal Lake matapos nagguwa ang report nga gintagbong sa amo nga lake ang mga bangkay sang mga nagkaladula nga mga manugbulang.
Suno kay Laurel Mayor Lyndon Bruce, talalupangdon nga nagnubo ang baligyaanay sang isda sa mga merkado sumugod sang nagguwa ang balita nahanungod sa ginapahayag pagtagbong sang mga lawas sa Taal Lake.
Dugang pa sang natungdan nga madamo sa mga residente sang iya nga banwa ang nagalaom sa pagpangisda bilang nagapanguna nga ginakuhaan sang pangitan-an.
Nahibaluan nga ang Taal Lake isa sa mga nagapanguna nga ginakuhaan sang tilapia kag bangrus sa pungsod, nga nagasuplay sa Metro Manila kag sa bug-os nga CALABARZON region.
Ginpasiguro sang alkalde sa publiko nga luwas nga kaonon ang mga isda gikan sa lake.
Nagpahayag man siya sang suporta sa plano sang gobyerno nasyonal nga magpatigayon sang diving operations sa Taal Lake agud usisaon ang lugar kun sa diin ginapahayag ginhaboy ang mga lawas sang mga manugbulang.
Ang Taal Lake nga may kadalumon nga 172 metros kag ikatatlo nga pinakadako nga lake sa Pilipinas, ang napalibutan sang mga banwa sang Agoncillo, San Nicolas, Balete, Alitagtag, Cuenca, Mataasnakahoy, Lipa City, Tanauan City, Santa Teresita, Talisay, kag Laurel.
Padayon ang imbestigasyon sang mga otoridad kaangut sang kaso sang mga nagkaladula nga manugbulang, samtang nagalaom ang mga manugpangisda kag lokal nga gobyerno nga liwat nga magabalik ang pagsalig sang publiko sa mga produkto sang nasambit nga lake.
