Nagalaum ang Presidential Anti-Organized Crime Commission (PAOCC) nga madula na ang tanan nga iligal nga Philippine Offshore Gaming Operators (POGO) sa tuig 2025.
Suno kay PAOCC Executive Director, Undersecretary Gilbert Cruz, masobra lang sa isa ka gatos ka mga POGO ang naga-operate sang small-scale sa pungsod matapos ang pagdeklarar sang total ban ni Presidente Ferdinand R. Marcos Jr. sa mga POGO.
Halin sa dalagkuan nga POGO hubs suno kay Cruz, kalabanan sa mga operator nga naganegosyo sa karon halin sa mga apartment, condominium, kalakip na sa ila mga hotel ukon resort.
Nauna na nga naluwas sang PAOCC ang 34 ka Indonesian halin sa POGO hub sa Pasay kag gin-aresto ang isa ka babaye nga Chinese nga si Liu Meng, duha ka indi pa kilala nga Chinese national, kag isa ka Malaysian.
Suno kay Cruz, ang mga Indonesian, ang naghambal sa mga awtoridad nga sila ang ginpilit nga magtrabaho para sa isa ka “fraudulent operation” sa Pasay.
Matapos suspendihon ang mga aktibidad sini sadtong Enero 21, tinutuyo sang kumpanya nga masaylo ini sa Cambodia.
