ROXAS CITY – Nakahunong sa gihapon sa karsel sang Dumarao Municipal Police Station ang 45-anyos nga pari matapos magpalupok sang armas luthang sa Poblacion Ilaya, Dumarao, Capiz.
Sa interview sang Bombo Radyo sa hepe sang Dumarao PNP nga si Chief Inspector Juvy Cordero, ginpahayag sini nga nag-ugat ang insidente sang nakita sang pari nga ginkilala nga si Federico Lim, Jr, residente sang Brgy. Bailan, Pontevedra, Capiz kag kura paroko sang Our Lady of the Snows sa banwa sang Dumarao nga naka-park sa atubang sang kumbento ang apat ka mga motorsiklo sang mga pamatan-on.
Ginkaakig ini sang pari bangud indi makaagi ang salakyan sang iya mga bisita rasun nga iya ginpangtumba ang mga motorsiklo.
Ginkakibot naman sang mga pamatan-on sang ila nakit-an ang ila motorsiklo rason nga ginhangkat sang mga ini ang nasambit nga pari nga magpanaog sa kumbento kadungan sang paghaboy sang mga ini sang bato.
Hinali na lamang nagpalupok ang nasambit nga pari sang iya calibre .45 pistol apang maswerte naman nga wala sang napilasan sa insidente.
Aminado naman ang pari nga pagpalupok ini sang armas apang ginpanindugan nga wala siya sang katuyuan nga luthangon ang mga kabataan.
Gin-aku man sini nga nakainom siya sang natabo ang insidente.
