ROXAS CITY – Arestado ang 41-anyos nga parolado sa pagduso sang droga sa ginkasa nga drug buy bust operation sang mga katapo sang Provincial Drug Enforcement Unit (PDEU) sa sulod sang isa ka lodge sa Plaridel Street sining syudad.
Ginkilala ang arestado kay Jose 2 R Sumeran sang Barangay Poblacion Ilawod, Dumarao, Capiz.
Narekober sa paghinakop sang arestado ang 2 ka sachets sang ginapatihan shabu, 3 ka bukas nga sachets nga may shabu residue, P500 nga marked money, P340 nga cash kag cellphone.
Suno kay Sumeran, nag check in ini sa lodge bangud may ginahulat ini nga babaye nga nakilala niya kagabi sa Roxas Avenue apang tuman ang kakibot sini nga mga katapo sang kapulisan ang nagsulod sa iya gin rentahan nga hulot.
Ginapanginwala ni Sumeran nga nagaduso ini sang illegal nga druga apang aminado nga katapusan sini nga gamit sang shabu sang nagligad lamang nga semana.
Suno pa sa suspek nga nagpadulong ini sa nasambit nga lodging house kag ginahulat lamang ang nakilala nga babaye sa Roxas Avenue kagab-I, apang nakibot ini sang ginsulod sang mga pulis.
Aminado ang arestado nga nagagamit ini sang droga apang hugot nga ginpanginwala nga naga duso ini kabaliskaran sa pahayag sang mga otoridad.
Sa karun nakahunong na sa karsel sang Roxas City PNP si Sumeran kag magapangatubang sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
