Epektibo na ang partial shutdown sang gobyerno sang Estados Unidos sang Amerika pagkatapos sang kapaslawan nga mapasar ang 2026 nga budget antes ang gintalana nga deadline.
Ang mayor nga rason amo ang kaakig sang mga Democrats sa pagpatay sa duha ka Amerikano nga nagaprotesta sa Minneapolis sang mga ahente sang federal immigration, nga nag-delay sang mga paghambalanay may kaangtanan sa ginpalawig nga pondo para sa Department of Homeland Security (DHS), nga nagadumala sang Immigration and Customs Intelligence (ICE).
Bangud sa partial shutdown, ginalauman nga temporaryo nga mag-untat ang pila ka non-essential operations sang gobyerno sa paglakip sang mga serbisyo tubtob nga ma-aprubahan sang US Congress ang short-term funding bill ukon full-year budget.
Sa subong, ginatinguhaan sang mga lider sang kongreso nga makatipon sang bastante nga boto para mapasar sang House of Representatives ang hagna nga gin-aprubahan sang US Senate sa tion nga magbalik ang sesyon sang Kamara sa Lunes, Pebrero 2.
Suno kay House Speaker Mike Johnson, pagabotohan nila ang Senate-approved budget bill sa Lunes sang aga samtang ginpahayag ni US President Donald Trump nga gilayon niya nga pirmahan ang nasambit nga layi.
Ini na ang ikaduha nga shutdown sang gobyerno sang nagligad nga tuig sa idalom sang ikaduha nga termino ni Trump. Ini man ang 11 ka semana halin sang natapos ang katapusan nga pagbinaisay sa pondo, nga naglawig sang 43 ka adlaw, nga ginakabig nga pinakamalawig nga pagsira sang gobyerno sa maragtas sang Amerika.
