ROXAS CITY – Ginmando sang korte nga ihilway ang iloy nga wala ginpahanugotan sang ospital nga makaguha sa kapaslawan nga makabayad sa dako nga balayran sini sa ospital.
Sa duha ka panid nga order nga ginpapanaog ni Judge Kristine Tiangco-Vinculado sang Regional Trial Court Branch 17 sining syudad, ginmanduan sini ang Saint Anthony College of Roxas City, Inc. (Hospital) nga i-release ang pasyente nga si Maelyn Arrojado bangud wala sang kinamatarong ang nasambit nga balay bulolngan nga i-detain ini sa kapaslawan nga mabayaran ang bill sini sa ospital.
Mahibaluan nga na confine sa nasambit nga ospital si Arrojado sang Abril 13 agud magbun-ag.
Wala sini ginalauman nga maga deliver ini pinaagi sa caesarian section sa iya babaye nga lapsag.
Naglab-ot naman sa masobra P100,000 ang balaydan sini sa ospital bangud na confine man ang iya nga bag-o bun-ag nga lapsag bangud sa komplikasyon.
Makaligad ang pila ka adlaw, ginpahanugotan na ini sang iya nga doktor nga makaguha sa ospital upod ang iya nga lapsag.
Nagbayad ini sang P41,000 nga cash kag nagpasalig nga bayaran sini ang nabilin nga balayran.
Apang ginaalegar nga wala nagpasugot ang tagdumalahan sang ospital nga paguhaon si Arrojado sa pihak sang pag ampo sini, pagpasalig nga bayaran sini sang amat-amat ang nabilin nga balayran, pag collateral sang balay sang iya nga iloy kag pag execute sang promissory note.
Dugang pa nga alegasyon ni Arrojado, halos limitado na ang hulag sini sa sulod sang ospital, may mga personnel man sang balay bulolngan nga naga bantay sa iya sa halos tanan nga tion.
Bangud sini nagdangop sa korte ang pamilya sang tagreklamo sa bulig sang ila abogado nga si Atty. Christian Bryann Tidong.
Wala naman mapaslawan si Atty. Tidong nga makakuha sang Writ of Habeas Corpus pabor sa kliyente sini.
Matapos ang pag-atubangay sang kampo ni Arrojado kag sang tagdumalahan sang ospital sa korte, ginpaburan sang regional trial court ang tagreklamo kag nagmando ini nga i-release sa gilayon ang amo nga ginang sa sulod sang duha ka oras matapos nga maka pasa sang promissory note.
Tuman naman ang kalipay sang ginang bangud nakaguha na ini sa ospital upod ang iya bag-o bun-ag nga lapsag makaligad ang pila ka adlaw nga nangin limitado ang hulag sini.
Samtang ginatinguhaan naman sang Bombo Radyo nga kuhaan sang pahayag ang tagdumalahan sang Saint Anthony College Hospital may kaangtanan diri.
(PHOTO FROM WEB)
