Nagapadayon ang imbestigasyon sang Pavia Municipal Police Station (MPS) matapos makita sa pila ka CCTV footage ang presensya ni Frank Rois Barbasa antes nasapwan ang sunog nga bangkay sa sulod sang subdivision sa Brgy. Ungka I, Pavia pasado alas 4 sang kaagahon sang Abril 29, 2026.
Suno kay PCapt. Ritz Field Presquito, hepe sang Pavia MPS, ang mga CCTV footage nagapakita sang klaro nga paglihok ni Barbasa antes ang insidente, apang ginpahamtang nga indi pa ini sapat agud maghatag sang final nga konklusyon sa kaso.
Base sa record, nakita siya nga naghalin sa La Paz alas 5:03 sang hapon sang Abril 28 sakay sang blue Suzuki sedan nga grab car, kag nagkadto sa Mandurriao antes magbalik sa iban pa nga lokasyon.
Sa gab-i sang amo nga adlaw, nakita siya liwat nga nagasakay sa grab kag nagkadto sa GT Mall, antes masiplatan sa CCTV sa sulod sang subdivision alas 8:52 sang gab-i nga nagalakat-lakat.
Ginpahayag man nga nag-istorya si Barbasa sa iya abyan nga magpahuway anay ukon mag-“Do Not Disturb” sa sulod sang isa ka semana bangud sa personal nga problema kag utang.
Ginakonsiderar sang kapulisan nga posible nga may dala nga ID kag iban pa nga gamit si Barbasa malapit sa crime scene, gani padayon ang validation sang mga ebidensya.
Padayon pa ang pagtipon sang dugang nga CCTV footage kag impormasyon agud matumod ang tinuod nga kahimtangan antes nasapwan ang wala pa matumod nga sunog nga bangkay.
