ROXAS CITY – Ginklaro ni Hon. Eleonor S. Dullano Punong Barangay sang Barangay Tabuc, Pontevedra Capiz nga wala niya ginadampigan si alyas “Medel” chief tanod sang ila barangay matapos ginatudlo suspek sa pagpangluthang sa isa ka pumuluyo sa ila lugar.
Mahibaluan nga nag-angkon sang pilas sa iya abaga ang biktima nga si alyas “Robert” 34-anyos, matapos ginapahayag nga ginluthang sang chief tanod.
Sa interview sang Bombo Radyo kay PB Dullano, ginpahayag sini nga natabo ang insidente kadungan sang amateur singing contest sa ila lugar kag bisperas sang fiesta.
Suno kay PB Dullano, bangud yara na sa impluwensya sang makahulubog nga ilimnon ang kadam-an ginsugo sini niya ang chief tanod nga idul-ong na sa ila tagsa ka puluy-an ang pumuluyo kag sa iya pagbalik may yara sang impormasyon nga ginapahayag papulion na si PB Dullano bangud may yara sang nagaplano nga tumbahon ini ukon patyon.
Bangud sini, gilayon nga ginkompronta sang amu nga chief tanod ang pamilya Buhat kag ginpamangkot kung sin-o ang may plano nga magpatumba kay PB Dullano, apang hinali na lamang nga may naglutad nga komosyon kag lupok sang armas-luthang kag ginatudlo nga ang chief tanod ang nagpalupok.
Ginpahayag man sini nga indi matuod nga nagahupot ini sang armas-luthang nga gingamit sa pagtiro sa nasambit nga biktima bangud wala ini nakuhaan sang mga kapulisan
Matigdas man nga ginpahayag ni PB Dullano nga wala niya ginadampigan ang chief tanod bangud sa pagkamatuod suno sa iya gin-akigan niya ini matapos ang natabo kag ginsilingan nga indi magpalagyo sa baylo atubangon kag sabton ang mga pamangkot.
Bangud sa natabo, ginpadangat sa Bailan District Hospital ang biktima nga gilayon naman nga makaguha matapos dapatan sang bulong
Samtang, ginsiling ni PB Dullano nga indi nagikan sa iya chief tanod ang amu nga pagpalupok sang armas luthang bangud daplis lamang suno diri ang pilas sang biktima bangud kung lantawon suno sa iya kung ang chief tanod sini ang nagluthang kag may tuyo indi lamang ini ang maangkon sang biktima.
Sa karun, handa nga magpasaka sang kaso ang pamilya sang biktima batuk sa nasambit nga chief tanod.
