Ginpanginwala ni Presidente Ferdinand Marcos Jr. ang alegasyon ni anay PNP chief kag sa karun Senator Ronald Dela Rosa batuk sa subong nga administrasyon nga gintuyo nga iulamid ang Senador kaupod sanday anay Presidente Rodrigo Duterte, Senator Bong Go kag anay Criminal Investigation Detection Group chief Lt. Gen. Gerald Caramat nga yara sa likod sang ilegal nga POGOs sa pungsod.
Ginhimu sang Presidente ang pagklaro kasunod sang akusasyon ni Sen. Dela Rosa batuk kay Mary Ann Maslog nga isa ka scam suspect nga ginamanduan suno sang Malacañang nga papirmahon si Alice Guo sang isa ka affidavit kag ginatumod siya kag sanday ex-PRRD nga yara sa likod sang POGO sa nangin hearing sang Senado sadtong Martes, Oktubre 8.
Apang sa isa ka interview sa Presidente sa sideline sa iya nga pagtambong sa ASEAN Summit sa Laos, pahayag ni Presidente Marcos nga wala niya nakilala si Mary Ann Maslog.
Matandaan, nga naangut si Maslog sa 1998 textbook scam nga kadugayan nabulgar nga ginpeke ang iya pagkapatay para malikawan nga makasuhan kag sa karun nagagamit ini sang pangalan nga Jessica Francisco. Apang nabulgar naman ini nga buhi pa matapos naaresto sang NBI sadtong Setyembre 25 sang madiskubre nga si Maslog kag Francisco ang isa katawo lamang pinaagi sa ginpatigayon nga fingerprint matching.
