Matapos ang komprehensibo nga pagtuon sa mga economic managers sang pungsod, ginpirmahan na ni Pangulong Ferdinand “Bongbong” Marcos Jr. subong nga Lunes ang pondo para sa fiscal year 2025.
Ang pagpirma ginpatigayon sa Ceremonial Hall sang Malacañang Palace kag gintambungan sang mga mamalidha kag importante nga opisyal sang gobyerno.
Sa iya nangin pahayag, ginsiling sini nga masobra P194-B nga balor sang mga item ang iya na-veto sa budget.
Isa ka importante nga punto nga pagbinaisay sa ginpasaka sang Kongreso ang P26-B nga pondo para sa Ayuda sa Kapos ang Kita Program (AKAP), pagbuhin sang budget sang Department of Education (DepEd), kag zero subsidy para sa Philippine Health Insurance Corporation (PhilHealth).
Ang budget cuts para sa DepEd, ginhimo sa pihak sang probisyon sa 1987 Constitution nga nagamando sa estado nga hatagan sang pinakamataas nga prayoridad ang edukasyon sa budget sini.
Pag-abot sa Philhealth, una na nga ginpahayag ni Senate Finance Committee Chairperson Grace Poe nga wala sang mabaton nga subsidy ang state insurer sa 2025 budget, kag ginhatagan sang pagtamud nga P600-B sa gihapon ang reserve funds sang PhilHealth.
Bangud sini, ginsiguro ni Marcos nga may bastante nga pondo ang PhilHealth agud padayon nga makahatag sang serbisyo para sa ikaayong lawas sa pihak sang pagkakas sang subsidy sini sa gobyerno.
Ginhatagan man sang pagtamud sang Malacanang nga maid-id nga ginrepaso sang Pangulo ang General Appropriations Bill agud masiguro nga nagakaangay ini sa Konstitusyon sang Pilipinas. Matandaan una na nga ginsiling ni Executive Secretary Lucas Bersamin nga ang pila ka probisyon sang national budget ang i veto sa kaluwasan sang public welfare kag fiscal responsibility.
Samtang, nag-angkon naman sang kahangawa sa ulihi nga bersyon sang 2025 General Appropriations Bill, bangud gintalakay lamang ini sang mga chairperson sang Senate Committee on Finance kag House Committee on Appropriations sa ginpatigayon nga bicameral conference.
