Nagpasalig si Pangulong Ferdinand Marcos Jr., sa mga natungdan nga ahensya sang gobyerno sa kaluwasan kag kaayuhan sang mga Pilipino sa Iran kag Israel.
Sa subong yara sa Amman Jordan ang team nga magasugata sa mga Pilipino nga naghalin sa Israel kag magadala sa ila pabalik sa Pilipinas ukon ang mga nagpabutyag sang ila tuyo nga magbalik sa pungsod sa tunga sang giyera sa tunga sang Iran kag Israel.
Suno kay Palace Press Officer USec. Claire Castro nga hugot nga ginmanduan ni Presidente Ferdinand Marcos Jr ang DMW, , DFA kag OWWA nga unahon ang kaayuhan kag kaluwasan sang mga Pilipino sa magtimbang nga pungsod.
Lakip sa bulig nga igahatag sa mga Pilipino nga i-evacuate apang indi pa luyag magpauli amo ang ila temporaryo nga ilistaran, pagkaon, kag bulig pinansyal.
Ginpahayag ni Castro nga para sa mga luyag magpauli sa Pilipinas, may yara sang 150 mil pesos nga bulig pinansyal, suporta sa transportasyon kag akomodasyon, bulig medikal kag bulig sa palangabuhian.
Kadungan sini, ginhingyo ni Malakanyang ang mga Pilipino sa Iran kag Israel nga makig-angot sa embahada kag konsulado sang Pilipinas sa diin sila nahamtang agud mapahibalo ang ila sitwasyon kag mahibaluan kon ano nga bulig ang ila luyag ukon mahimo mahatag sang gobyerno.
