LAOAG, ILOCOS NORTE – Nagpromisa si Presidente Ferdinand R. Marcos Jr. nga ihatag niya ang iya bug-os nga suporta sa mga atleta nga mga Pilipino matapos sini nga ginbuksan ang ika-65th Palarong Pambansa sa Ferdinand E. Marcos Sr. Memorial Stadium sa Laoag, Ilocos Norte.
Suno kay Marcos, kutob sang ila nga masaranagan, ginahimo nila ang tanan agud mabuligan ang mga kabataan nga mangin maayo sa patag sang hinampang. Ginsiling pagid sini nga ang gobyerno ara permi agud maghatag sang suporta sa mga atleta bangud nga suno sa iya, ang kadalag-an sang isa ka Pilipino nga atleta – kadalag-an man nila.
Dugang pa sang Presidente, daog man ukon pyerde, sa gihapon makabig sila nga mga kampyon bangud sa mga kadayaw-dayaw nga mga abilidad sini sa isports kag dedikasyon nga magdaog sa kompetisyon.
Samtang, ginpahanumduman man ni Marcos ang mga atleta nga tatapon ang tagsa nila ka kalawasan kag ipadayon ang pagtupad sa tagsa nila ka mga handom tubtob sa makuha nila ang kadalag-an.
Ginsiling man sini nga sa palaabuton nga mga inadlaw, pila sa ila ang mahimo nga magrepresentar sang pungsod sang mga pangkalibutanon nga kompetisyon.
Bida sa Palarong Pambansa subong nga tuig ang 24 ka mga regular nga isport, kalakip ang athletics, basketball, volleyball, gymnastics, taekwondo, kag swimming.
Yara sa kapin 15,000 ka mga delegado nagikan sa 20 athletic associations, kalakip ang 18 ka rehiyon sang pungsod, ang National Academy of Sports, kag Philippine Overseas Schools, ang magapasakop umpisa subong nga adlaw, Mayo 25 tubtob 30, 2025.
