ROXAS CITY -Preparado na ang deployment plan sang mga katapo sang Philippine Coast Guard (PCG)-Capiz para sa kapiyestahan ni Sr. San Juan De Bautista sa pila ka mga baybayon sa probinsiya sang Capiz.
Ini ang ginpahayag ni Lieutenant Commander Edison Diaz, Station Commander sang PCG-Capiz sang mainterview sang Bombo Radyo.
Ginpasalig ni Diaz nga may mga personnel sang PCG-Capiz nga natalana nga iga-deploy agud magmonitor sa mga indibidwal nga magapadulong sa pila ka mga baybayon sa probinsiya.
Gindugang pa ni Diaz nga preparado naman ang mga floating assets sang ila talatapan sa tion sang emerhensiya.
Magluwas sa mga baybayon, ginkompirmar man ni Diaz nga may yara man sang mga personnel nga natalana nga iga-deploy sa mga kasubaan nga posible padulongan sang mga indibidwal.
Nagpahandumdum man si Diaz nga hugot nga pagadumilian ang pag-inom sang makahulubog nga ilimnon sa pampubliko nga lugar kag hugot nga iga-obserbar ang social distancing kag pagsuksuk sang facemask.
Samtang hugot man nga pagadumilian sang mga katapo sang PCG-Capiz ang pagpaligo sa baybayon sa siyudad sandig sa direktiba nga ginpapanaog ni City Mayor Ronnie Dadivas.
