Ginpahayag sang Philippine Coast Guard nga indi mangin mahapos ang pagpangita sa mga nadula nga mga sabungero nga gin-alegar ginhaboy sa Taal Lake.
Ginpahayag ni PCG Spokesperson Capt. Noemie Cayabyab nga ang ila mga technical divers mahimo nga maga-atubang sang nagkalain-lain nga pagpanghangkat.
Nahibaluan nga may kadalumon nga 170 metros ang Taal Lake samtang 100 metros lamang ang pinakamadalom nga ila na-dive.
Nahibaluan man sang PCG ang wala kasiguraduhan nga kalidad sang tubig sa linaw kag ang malain nga kondisyon sang panahon subong nga adlaw bangud sang pag-ulan.
Ginakonsiderar man nila ang aktibidad sang Taal Volcano sa ila pagpangita.
Ginpahayag man nila nga madugay na ini nga yara sa idalom sang tubig kag posible nga wala na ini sa lugar kun sa diin ini ginhaboy kon matuod.
Sa pihak sini, ginpahayag sang PCG nga magakoordinar sila sa Philippine Navy agud mabuligan kag mapadasig ang pagpangita sa mga missing sabungero nga masobra na apat ka tuig nga nagapangita sang ila mga pinalangga sa kabuhi.
